Fut present en sa personne Messire Loys de Ronsart, chevallier, seigneur de la Poissonniere, de la Chappelle-Gauguyn, conseiller et maistre d'hostel ordinaire de Monseigneur le Dauphin, sain de pensée, memoire et entendement, ferme comme par ses gestes, parolles et maintien il est apparu aux notaires soubzsignez, neantmoins gisant au lict mallade de son corps, considerant qu'il n'est riens plus certain que la mort ne plus incertain que l'heure d'icelle, ne voullant de ce monde decedder intestat mais tendis que sens, raison et memoire sont en luy et gouverne sa pensée et paroles, a voullu et veult faire son testament et ordonnance de derniere volunté, ou nom du Père, du Filz et du benoist Sainct-Esperit, des biens que Dieu nostre Createur luy a delivrez et prestez en ce mortel monde, en la forme et maniere qui ensuit.

Et premierement, icelluy de Ronsart recommande son ame à la benoiste et très glorieuse saincte Trinité de paradis, à la glorieuse et sacrée Vierge Marie, advocate des paouvres pecheurs, à Monseigneur sainct Michel ange et archange, conducteur de son paouvre ame, à Messieurs sainctz Jehan Baptiste et Evangeliste, sainctz Pierre, Raoul, Gervais, Prothais et sainct Martin et generallement à toute la court celeste de paradis.

Item, veult et ordonne que par ses executeurs cy-après nommez ses torsfaictz estre reparez et ses debtes estre payées par ses executeurs cy après nommez, à tous ceulx qu'ilz monstreront cedulle dud. Ronsart et de luy signées, et autres petites debtes qu'ilz pourroient et ont esté journellement faictes comme à bouchers, mareschaux et autres gens de mestier et ses serviteurs qui ont gaiges.

Item, quant de son corps son ame partira, il veult et ordonne icelluy estre inhumé et ensepulturé en l'eglise de Monseigneur Sainct-Gervais de Coultures au cueur d'icelle eglise au renc de ses predecesseurs ou devant son oratoire ainsi que sesd. executeurs l'adviseront.

Item, veult et ordonne que soit vestu aux despens de ses biens dix-huict paouvres de robbes et chapperons, c'est assavoir six paouvres de drap noir, six de drap blanc et six autres de drap gris et iceulx paouvres estre prins partie aud. Coultures, partie à Sarcey, et autre partie à lad. Chappelle Gauguyn, lesquelz paouvres porteront les torches à l'entour dud. corps à son enterrement et premier service en icelle eglise dud. Coultures, auquel ilz assisteront.

Item, veult et ordonne estre baillé à ceulx qui porteront sond. corps en sepulthure à chascun cinq solz tournoiz et à celluy qui fera sa fosse et sonnera les cloches dud. Coultures durant sesd. convoy et premier service aud. lieu dix solz tournoiz.

Item, veult et ordonne qu'il y ait aux torches que porteront lesd. paouvres en l'église et sur son corps durant sesd. convoy et services ses armes en escussons, dont en a partie de faictz aud. lieu de la Poissonnière.

Item, veult aussi et ordonne que le jour de sond. enterrement il soit donné et aulmosné par sesd. executeurs cent liars à cent paouvres si tant s'en peult trouver lors ou sinon le reste qu'il s'en deffauldra sera deslivré les autres jours après et au bout de l'an, ou jour de seyne autant de lyars et à tant de paouvres que aud. jour de son enterrement, auquel bout de l'an il veult et ordonne estre dict et celebré en lad. eglise de Coultures pareil service de cent messes et ainsi que declaré est cy devant à sesd. service et enterrement.

Item, veult et ordonne estre dict et celebré en lad. eglise de Coultures le jour dud. enterrement, si faire se peult, cent messes, dont les quatre-vingtz seront des Trespassez, cinq de la Trinité, cinq du Sainct Esperit, cinq de la Passion et cinq de Nostre Dame.

Item, pareillement, led. testateur ordonne qu'il soit aussi dict et celebré troys trentez depuis le jour dud. enterrement jusques au jour dud. seyne, l'un d'iceulx trentez sera dit et celebré en lad. eglise de Coultures qui sera gregoriain, l'autre et second trenté en l'eglise de lad. Chapelle-Gauguyn et les messes d'icelluy cellebrées partie de Nostre-Dame, du Sainct-Esperit, partie de la Passion, des Appostres, Martirs et Confesseurs qui est de chascun cinq et le tiers et dernier trenté en l'église Sainct-Martin de Sercey, dont Sarceau est de la paroisse, et dud. trenté seront dictes dix messes des Trespassez, autres dix de la Croix et le reste des Vierges.

Item, veult et ordonne que si sesd. executeurs sont de cest advis que ausd. premier service où sera dict cent messes assiste dix cordeliers presbtres du couvent de Vendosme et dix Augustins du couvent de Montoire pour aider à dire lesd. cent messes, ausquelz sera faict aulmosne à la discretion de sesd. executeurs.

Item, ordonne icelluy testateur estre baillé aulmosne et delivré à neuf paouvres filles à marier, pour subvenir et ayder à les marier, à chascune d'elles cent solz tournoiz à ce qu'elles prient Dieu pour l'ame d'icelluy testateur.

Item, veult et ordonne led. testateur que s'il a quelque robbe de veloux qu'elle soit baillée, delivrée et applicquée à faire un drap ou poille servant à mortuaires garny d'une croix blanche de satin pour icelluy estre mis sur sa tumbe et sepulture et de ses predecesseurs trespassez.

Item, ledict Ronsart testateur donne et legue à Jehan Neullet, Gasnyer, Mathelin Boure, Nicolas Louvel, Prothaise Bizot et Bertrand Pitoue, ses serviteurs, leurs vies durant seullement, assavoir aud. Jehan Neullet ung septier, aud. Gasnier six boisseaulx, aud. Mathelin Boure aussi six boisseaulx, aud. Nicolas Lovel troys septiers, aud. Prothaise Bizot quatre septiers et aud. Bertrand Pitoue ung septier le tout de bled froment de rente viagere, mesure de Montoire payables chascun an au jour Sainct-Remy, premier jour d'octobre, leursd. vies durant (...) revocque tous autres testamens et codicilles auparavant par luy faictz et passez, voullant que cestuy sortisse et vaille son plain et entier effect, force et vertu. Promectant (...)- Faict et passé multiple l'an mil Vc quarante-quatre le vendredi sixiesme jour de juing.

[Paraphe d'Hinselin, notaire] LECLERC [notaire]

Voir une description plus complète de l'acte sur l'instrument de recherche imprimé en ligne (rubrique 'Autres instruments de recherche').

Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 73, notice n° 1 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2011 Date de révision :

2009 Date de création de la notice :