'... quant à son corps, il a esleu... sa sépulture en l'esglise du colleige du Cardinal Le Moyne.., ouquel... il est demourant..., en tel lieu... qu'il sera advisé entre ses exécuteurs... et... les maistre et ses confrères boursiers...

Item, s'il se trouve que led. testateur doibve aucunes debtes ou tors par luy faictz, dont maistre Nicolle Beaupigné, son homme, et maistre Jehan de La Verdure auront congnoissance, il veult... en estre satisfaict.

Veult aussi... que de tous ses affaires dont ledict me Nicolle s'est entremis pour luy, tant comme son procureur que comme serviteur, et tant en recepte que despense, led. Beaupigné en soit creu à sa simple affirmacion et parolle, et prie ses exécuteurs, en considéracion des bons et aggréables services qu'il luy a faictz et par longue espace de temps, qu'ilz le traictent en toute faveur, luy allouant tout ce qu'il dira avoir mis et exposé pour luy et pour ses affaires, et si a led. testateur quicté... led. Beaupigné de toutes les receptes de deniers qu'il peult avoir receuz dud. Vatable, ou autres pour luy, auparavant huy, tant à cause de ses bénéfices que autrement, en quelque manière que ce soit, et dont led. Beaupigné pourroit avoir faict et baillé quictance ou récépissé soubz son seing manuel ou pardevant notaires, que autrement, soit aud. testateur ou autres pour luy, de tout le temps passé jusques à huy.

Item, désirant de tout son cueur subvenir et pourveoir aux neccessitez de sa bonne mère, il luy donne, sa vie durant, l'usuffruict de sa maison et appartenances, assise ès faulxbourgs Sainct Victor, en laquelle maison elle est à présent demourant, et pareillement luy donne l'usuffruict des meubles à luy appartenans, estans en ladicte maison, à la charge touteffoys que sad. mère ne pourra vendre ne aliéner led. usuffruict tant de maison que desd. meubles.

Et quant à la propriecté de ladicte maison et appartenances, et pareillement des meubles estans en icelle, appartenans aud. testateur, il les donne, et ordonne qu'ilz soient venduz et les deniers distribuez aux paouvres, entre lesquelz il veult ses nepveuz et niepces estre préférez.

Item, pour subvenir aux neccessitez de sad. mère, la reste de ses jours, il veult... que par ses exécuteurs ou l'ung d'eulx, [il] soit retenu entre ses mains de l'or et argent monnoyé et [la] monnoye qui se trouvera en sa possession à l'heure de sa [mort], la somme de quatre cens escuz d'or soleil, et que d'icelle [il] soit distribué, par chascun an, à sad. mère la somme [de] vingtz livres tournois, partissant icelle et la distrib[uant de] sepmaine en sepmaine esgallement, jusques au parachèvement d' [icelle] distribucion.

Et où au jour du décez de sad. mère, res[teroit...] à distribuer de ladicte somme de quatre cens escuz d'or soleil, il a ordonné... que lad. reste soit distribuée aux paouvres, préférant tousjours ses parens.

Et en oultre a prié... sesd. exécuteurs tenir la main que sad. mère soit bien pensée le reste de ses jours, leur donnant povoir employer ses biens ad ce, tant et si avant qu'ilz verront estre affaire.

Item, donne à sa seur Jehanne, demourant avec sad. mère, pour l'ayder à vivre, la somme de cent livres tournois, qui luy sera distribuée à troys foys, et à chascun de ses enffans, qui sont... quatre, pour les ayder à dresser, la somme de cinquante livres tournois, qui leur sera distribuée par sesd. exécuteurs, ainsi qu'ilz verront estre pour le bien desd. enffans.

Item, donne à sa seur Anthoinette, pour ayder à conduire son mesnage,... cent escuz d'or soleil, et à sa niepce, sa fille,... cent escuz d'or soleil pour ayder à la marier, laquelle somme il veult demourer ès mains de sesd. exécuteurs jusques à ce qu'elle aura trouvé son party.

Item, donne à son nepveu Thomas Bridart et à sa niepce, sa femme, pour leur ayder à vivre... cinquante livres tournois.

Item, donne à ses deux autres niepces, filles de sa seur Anthoinette, à chascune d'icelles... dix escuz soleil.

Item, donne à sa niepce, fille de maistre Pierre Carré,... dix escuz d'or soleil, et aud. me Pierre... dix escuz soleil.

Item, donne à maistre Mathieu Bérouart toute sa librairie, de quelque profession qu'elle soit, et oultre ce luy donne... cent escuz d'or soleil pour se faire passer docteur en médecine, laquelle somme led. testateur ne veult estre distribuée toute à une foys, ains prie sesd. exécuteurs tenir la main qu'il ne l'expose inutillement.

Item, donne à maistre Nicolle Beaupigné, pour les bons et aggréables services qu'il luy a faictz,... cent escuz d'or soleil.

Item, donne aussi à Jehan Le Maugnyer, aussi son serviteur,... cinquante livres tournois.

Item, veult... que par sesd. exécuteurs soit distribué aux paouvres... trente livres tournois, ès lieux et personnes qu'ilz congnoistront l'aulmosne la myeulx employée, dont il ne veult qu'ilz soient tenuz en prandre quictance, mais veult que à leur seulle affirmacion ladicte somme leur soit allouée.

Item, veult ... que à sa cousine Marguerite, demourant à Rouen, soit rendue une robbe qu'il a à elle, et à sa cousine Agnès, aussi demourant à Rouen, donne ... dix livres tournois.

Item, ordonne ... que ès lieulx de Suresnes et Puteaulx, Brumetz et Cocherel, dont il est curé, soient distribuez aux plus paouvres desd. parroisses, c'est assavoir à Suresnes ... cinquante livres tournois, à Brumetz ... trente livres tournois, et à Cocherel et Houllebec quarente livres tournois.

Item, ... ordonne que en chascun de ses bénéfices soit faict ung service solennel à son intention, à la discrection de sesd. exécuteurs.

Item, ordonne à ung paouvre homme ancien qu'il a nommé à sesd. exécuteurs (...)

Voir une description plus complète de l'acte sur l'instrument de recherche imprimé en ligne (rubrique 'Autres instruments de recherche').

Ernest Coyecque, Recueil d'actes notariés relatifs à l'histoire de Paris et de ses environs au XVIe siècle [étude XXXIII], t. II, 1532-1555 [3002 actes], Paris, 1923, p. 167, notice n° 4388 (instrument de recherche imprimé dématérialisé dont la version intégrale est accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2010-2012 Date de révision :

2009 Date de création de la notice :