Noble seigneur Joachin du Bellay, escuyer, seigneur de Lyré, demourant à Paris, ou nom et comme procureur general et special de Monseigneur le reverendissime Jehan, cardinal du Bellay, evesque d'Hostie, doyen du Sainct-Siege apostolicque et abbé de l'abbaye de Thiron, fondé de lectres de procuration en forme d'instrument public, passées en court de Rome, le septiesme jour de septembre mil Vc LVII dernier passé, signées en un seing de caractaire Joannes le Sane, ayant par icelles povoir et effect de substituer, de faire et passer ce qui s'ensuict, ainsi qu'il est apparu ausd. notaires par lesd. lectres de procuration, lequel seigneur Joachin du Bellay, aud. nom et en vertu du povoir à luy donné par icelles lectres de procuration, a substitué et substitue en son lieu et pour led. seigneur reverendissime Maistre Pierre Courault, secretaire dud. seigneur reverendissime et curé de Gence, evesché du Mans, auquel led. seigneur Joachin du Bellay oud. nom a donné et donne plain povoir de recevoir pour luy, oud. nom, toutes et chacunes les sommes de deniers qui aud. seigneur reverendissime sont et peuvent estre deues par chascun an par qui que ce soyent pour raison de la vente des boys de lad. abbaye de Thiron qui a esté par cy-devant faicte tant par noble et puissant seigneur Messire Martin du Bellay, chevalier de l'ordre du roy, seigneur de Langey, frère dud. seigneur reverendissime que par (en blanc) sieur de Menorvillier, maistre d'hostel dud. seigneur de Langey, en vertu du povoir aud. seigneur de Langey donné par iceluy seigneur reverendissime, son frere, du receu se tenir pour content et en faire et passer tant et telles quictances et descharges que au cas appartiendra et sera necessaire et generallement etc., promectant etc, obligeant etc.

Faict et passé l'an mil Vc LVIII le lundi premier jour d'aoust.

V. MAUPEOU [notaire] ANGIRART [notaire]

Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 329, notice n° 189 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2011 Date de révision :

2009 Date de création de la notice :