Furent presens Jean-Baptiste Pocquelin de Moliere, demeurant à Paris, rue Sainct-Thomas-du-Louvre, parroisse Sainct-Germain-de-l'Auxerrois, pour luy, en son nom, d'une part, et damoiselle Marie Hervé, veufve de feu Joseph Bejard, vivant escuier, sieur de Belleville, demeurante à Paris dans la place du Pallais royal, stipullante en cette partye pour damoiselle Armande Gresinde Claire Elizabeth Bejart, sa fille et dudict deffunct sieur de Belleville, aagée de vingt ans ou environ, à ce presente de son voulloir et consentement, d'autre part, lesquelles partyes, en la presence, par l'advis et conseil de leurs parens et amis, scavoir de la part dudict sieur de Moliere, de sieur Jean Pocquelin, son pere, tapissier et vallet de chambre du roy, le sieur André Boudet, marchand bourgeois de Paris, beau-frere à cause de dame Marie-Magdelaine Pocquelin, sa femme, et de la part de ladicte damoiselle Armande Gresinde Claire Elizabeth Bejard, de damoiselle Magdelaine Bejard, fille usante et jouissante de ses biens et droictz soeur de ladicte damoiselle, et de Louis Bejard, son frere, demeurans avec ladicte damoiselle leur mere dans ladicte place du Pallais royal, ont faict et accordé entre elles, de bonne foy, les traicté et conventions de mariage qui ensuivent : c'est ascavoir que lesdicts sieur de Moliere et damoiselle Armande Gresinde Claire Elizabet Bejart, du consentement susdict, se sont promis prendre l'un l'autre par nom et loy de mariage et icelluy solempniser en face de nostre mere saincte Eglize, sy Dieu et nostredicte mere s'y consentent et accordent, pour estre les futurs espoux uns et communs en tous biens meubles et conquestz immeubles, suivant et au desir de la coustume de cette ville, prevosté et vicomté de Paris. Ne seront tenus des debtes l'un de l'autre faictes et créées avant la celebration dudict mariage et, s'il y en a, seront payées par celuy qui les aura faictes et sur son bien sans que celuy de l'autre en soit tenu.

En faveur des presentes, ladicte damoiselle mere de ladicte damoiselle future espouze a promis bailler et donner ausdicts futurs espoux, à cause de ladicte damoiselle sa fille, la veille de leurs espouzailles, la somme de dix mil livres tournoiz, dont un tiers entrera en ladicte future communaulté et les deux autres tiers demeureront propres à ladicte future espouze et aux siens de son costé et ligne.

Ledict futur espoux a doué et doue sa dicte future espouze de la somme de quatre mil livres tournoiz de douaire prefix pour une fois payer, à l'avoir et prendre, quand il aura lieu, sur tous les biens dudict futur espoux qu'il hypotecque à cet effect.

Le survivant desquels futurs espoux prendra par preciput des biens de leur communaulté, tels qu'il voudra choisir reciprocquement jusques à la somme de mil livres suivant la prisée de l'inventaire et sans creue ou ladicte somme en deniers à son choix.

Advenant le deceds dudict sieur futur espoux avant celuy de sa future espouze, sera permis à icelle future espouze et aux enfans qui naistront dudict mariage d'accepter ladicte communaulté ou y renoncer et, en cas de renonciation, reprendre ce qu'elle aura apporté audict mariage, luy sera advenu et escheu par succession, donnation ou autrement, mesme elle, ses douaire et preciput susdicts, le tout franchement et quictement sans estre tenue des debtes de la communaulté en cas qu'elle y eust parlé.

S'il est vendu ou alienné aucuns heritages ou rentes racheptées appartenans à l'un ou à l'autre des futurs espoux, les deniers en provenans seront remplacez en autres heritages ou rentes pour sortir pareille nature et sy au jour de la dissolution de ladicte communaulté ledict remploy ne se trouvoit faict ce qui s'en deffauldra sera repris sur ladicte communaulté sy elle suffit, sinon à l'esgard de ladicte future sur les propres et autres biens dudict futur espoux.

Car ainsy a esté accordé entre lesdictes partyes. Promectans etc, obligeans etc; renonceans etc.

Faict et passé, à Paris, en la maison de ladicte damoiselle, l'an mil six cens soixante-deux le vingt-troisiesme jour de janvier, et ont signé :

J. POCQUELIN J.B. POQUELIN MOLIERE./. Armande Gresinde BEJART M. BEIART Louys BEJARD OGIER (notaire) Marie HERVÉ A. BOUDET PAIN (notaire).

Ledict sieur Pocquelin de Moliere, nommé en son contrat de mariage cy-dessus, recognoist et confesse que ladicte damoiselle Marie Hervé, veufve dudict feu sieur Bejart, aussy y nommée, mere de ladicte damoiselle, Armande Gresinde Bejart, luy a paié et d'elle confesse avoir receu ladicte somme de dix mil livres qu'elle avoict promis bailler et donner audict sieur de Moliere par ledict contract et en faveur d'iceluy, dont etc quictant etc.

Faict et passé ès estudes le vingt-quatre juin mil six cens soixante-deux et a signé :

J.B. POQUELIN MOLIERE ./. OGIER PAIN.

MC/ET/XLII/152

Acte coté en Réserve. Le document a été momentanément conservé au Musée de l'histoire de France sous la cote AE II 2118.

Madeleine Jurgens et Elisabeth Maxfield-Miller, , sur sa famille et sur les comédiens de sa troupe, Paris, Archives nationales, 1963, p. 366, notice n° CXXXIX (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier). Cent ans de recherches sur Molière

ou

Catalogue de la Réserve du Minutier central.

2009Date de création de la notice :

2011, 2015 (Marie-Françoise Limon-Bonnet)Date de révision :