Extrait du contenu :

Pardevant etc, fut present en sa personne noble homme Maistre Jehan Anthoine de Baif, secretaire de la chambre du roy, demourant sur les fossez de Paris, entre les portes Sainct-Marcel et Sainct-Victor, sain de corps et de pensée, allant et venant par la ville à ses affaires et s'estant transporté par devers lesd. notaires pour l'effect qui s'ensuict.

Lequel, considerant qu'il n'est chose plus certaine que la mort ne si incertaine que l'heure d'icelle, ne voulant decedder de ce monde mortel intestat, mais ce pendant que sens et raison gouvernent ses pensées, memoire et entendement voulloir ordonner et disposer des biens que Nostre Seigneur Jesus-Christ luy a donnez et prestez en ced. monde mortel, a faict, nommé et ordonné son testament et ordonnance de derniere volunté au nom du Pere, du Filz et du benoist Sainct-Esprit, en la forme et maniere que s'ensuict.

Et premièrement, led. testateur a recommandé et recommande humblement et devotement son ame à Dieu le createur, à la glorieuse Vierge Marie, Monsieur sainct Michel l'ange et arcange et à toute la court celeste du paradis, suppliant Dieu le createur du ciel et de la terre que par l'intercession de son filz Jesus Crist, il luy plaise remettre et pardonner ses faultes et offences, tout ainsi qu'il pardonne à ceulx qui l'ont offencé.

Item, veult et ordonne ses debtes estre payées et tortz faictz reparez si aulcuns en y a par ses executeurs cy après nommez, declarant que l'obligation qui est entre les mains de sa seur de la somme de cent escuz a esté payé et acquictée à René Pahoneau, son mary, des deniers que led. Pahoneau a receuz pour led. testateur du revenu de la cure de Sainct-Cosme de Verte que aultrefoys il a tenue au diocèse du Mans.

Item, de son enterrement et services s'en remect et rapporte à la discretion de sesd. executeurs sans y faire aulcunes pompes funèbres.

Item, icelluy testateur donne, legue et laisse tous et chacuns ses biens meubles et immeubles quelzconques qui luy apartiennent et apartiendront au jour et heure de son decedz, en quelques lieux qu'ilz soyent scituez et assis, sceuz ou trouvez et à quelque pris, valleur ou estimation qu'ilz se puissent monter à Guillaume Patu, filz de Anthoine Patu, marchant, demourant sur lesd. fossez, et de Jehanne du Bignon, sa femme, et ce, en recongnoissance des bons et agreables services que lesd. Patu et du Bignon ont faictz aud. testateur, de la preuve desquelz il relleve led. Guillaume Patu, et aussy pour la belle monstre que faict de quelque bon naturel led. Guillaume Patu, par laquelle il promect de rapporter ung jour fruict, et pour luy donner moyen de l'entretenir et faire meurir en sa saison avec l'aage. Et où led. testateur yroit de vye à decedz auparavant que led. Guillaume Patu ayt atteint l'aage de vingt ans, veult et ordonne que sesd. executeurs demeurent saisis de toute heredité et biens d'icelluy testateur jusques à ce que led. Patu ayt attainct led. aage de vingt ans, pendant lequel temps sesd. executeurs vendront les portions des maisons et aultres choses qui se trouveront en l'heredité d'icelluy testateur, desquelles la conservation n'apporteroit proffict aud. Guillaume Patu, et l'argent provenant de lad. vente sera mis par eulx en l'Hostel de ceste ville de Paris ou entre les mains d'un marchant suffisant le plus profitable aud. Patu, le tout à la discrettion et volunté de sesd. executeurs, lesquelz, pendant led. temps et jusques à ce que led. Patu ayt attainct led. aage de vingt ans lesd. exe cuteurs rendront compte du revenu de ses biens et de leur administration et luy bailleront et delivreront le reliqua, dont led. testateur les prye, en l'honneur de Dieu et de l'amytié qu'ilz portent aud. testateur, aussy mennyer lad. execution sans fraiz et sans s'arrester aux formalitez de justice, mais les ordonner et disposer ainsy qu'ilz verront bon estre en leur concience, dont il veult estre antierement creuz à leur simple parolle et affirmation sans qu'il leur puisse estre faict aulcun debat ny contredictz sur le compte.

Et advenant que led. Guillaume Patu aille de vye à decedz auparavant avoir attainct l'aage de vingt ans sans enfans ou enfant, n'ayant disposé desd. choses à luy données, en ce cas icelluy testateur donne lesd. biens et choses données à Joachim Thibault, dict de Corville, sieur de la Grande Maison, son bon amy, au cas qu'il soit lors vivant et ou cas qu'il soit lors deceddé à ceulx de ses enfans qui feront lors profession de la musicque tous et chacuns sesd. biens et choses données aud. Guillaume Patu pour estre par eulx et entre eulx partaigez esgallement.

Et, pour mectre à fin et execution deue led. present testament de poinct en poinct et article en article, selon sa forme et teneur, icelluy testateur a esleu et nommé ses chers et bien amez nobles personnes Maistres Jacques Michon, nagueres conseiller du roy en son trésor à Paris, Jehan Poisson diot d'Esgrephins, docteur en droictz, advocat au grand conseil du roy, et Thomas d'Elbene, notaire et secretaire du roy, ausquelz led. testateur a donné et donne plain pouvoir et les prye voulloir excuter sond. present testament et ordonnance de derniere volunté, de poinct en poinct et d'article en article, selon sa forme et teneur, comme bons et loyaulx executeurs peulvent et doibvent faire et qu'il a en eulx parfaicte fiance, ès mains desquelz ses executeurs il s'est desmis et dessaisy de tous chacuns sesd. biens jusques à l'entier acomplissement d'icelluy et a revocqué et revocque tous aultres testamens et codicilles qu'il pourroict avoir faictz et passez auparavant huy, voullant que cestuy seul vaille, tienne et sorte son plain et entier effect, force et vertu et s'arresta et arreste du tout en tout, soubmectant l'audition et arrest et closture du compte d'icelluy à la jurisdiction et contraincte de lad. prevosté de Paris.

Faict l'an mil Vc LXXIII, le jeudi XVIe jour de juillet.

BONTEMPS [notaire] LUSSON [notaire]

Origine de l'information :

Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 147, notice n° 50 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2011 ; 2023 (F. Aujogue)Date de révision :

2009 Date de création de la notice :