Maistre Jehan Daurat, lecteur du roy nostre sire ès lectres grecques en l'université de Paris, confesse avoir prins en soy la charge de faire la poursuicte et fournyr les deniers qu'il conviendra frayer et fournyr pour contraindre toutes personnes qu'il apartiendra à luy payer comme procureur de noble et discrette personne Maistre Florentin Regnard, conseiller du roy nostred. seigneur en sa cour de parlement, et de Maistre François de Benere, professeur en medecine à Paris, ou nom et comme executeurs du testament et ordonnance de derniere volunté de feu noble et discrette personne Maistre Jehan Strazel, en son vivant aussi lecteur ordinaire du roy nostred. seigneur èsd. lectres grecques en icelle université de Paris, une année des gaiges dud. deffunt Strazel à luy deue à cause de sond. estat de lecteur ordinaire du roy nostred. seigneur èsd. lectres grecques en icelle université de Paris, lors et au jour du trespas d'icelluy deffunt Strazel, et que, à ceste fin, lesd. sieurs Regnar et de Benere oud. nom luy ont passé procuration pardevant les notaires soubzsignez ce jour d'huy et pour faire lad. poursuicte à ses despens, perilz et fortunes et sans reppeticion d'aucuns fraiz et qu'il promect faire ou qu'il ne reçoive aucune chose desd. gaiges, à la charge toutesfoys que si par le moien de lad. procuration il peult recevoir lesd. gaiges, que led. Daurat sera achevé de paier sur iceulx de son legs et fraiz par luy faictz à la poursuicte desd. gaiges pour lesquelz fraiz, peines et vaccations dès à present led. de Daurat s'est contenté et contente de la somme de dix livres tournoiz sans aucune autre taxe et daventaige sera tenu, a promis et promect led. sieur de Daurat de rendre et restituer ausd. sieurs executeurs dessus nommez le reste desd. gages qu'il auroit ainsi receuz dedans la huictaine après la reception d'iceulx et sans prejudice de povoir par lesd. seigneurs constituans aud. nom repeter ce qu'ilz pourroient avoir par cy devant trop baillé aud. sieur de Daurat sur sond. legs eu esgard à la multitude et grandeur des legs dud. testament, suivant les protestations ja par lesd. sieurs constituans faictes au procès d'entre eulx et led. Daurat; car aultrement et sans lad. promesse et chose cy dessus, iceulx seigneurs constituans oud. nom n'eussent voullu bailler ne passer lad. procuration, nonobstant que par icelle de tout il ne soit faicte aucune mention, promectant etc, obligeant etc, renonçant etc.

Faict l'an mil Vc soixante, le XXVIe jour de decembre.

PERIER [notaire] FARDEAU [notaire]

Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 280, notice n° 152 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d'orientation général - Notaires de Paris, guides thématiques du Minutier).

2011 Date de révision :

2009 Date de création de la notice :