Document d'archives : Transaction entre Pierre de Ronsard, Jean-Antoine du Baïf, Amadis Jamyn, Jean Galland, Claude Tournet et Charles Garnier d'une...
Titre :
Transaction entre Pierre de Ronsard, Jean-Antoine du Baïf, Amadis Jamyn, Jean Galland, Claude Tournet et Charles Garnier d'une part, et Melchior de Thorigny, d'autre part.
Contenu :
Extrait du contenu :
Par devant Thomas Perier et Nicolas Fardeau, notaires du roy nostre sire en son Chastellet de Paris, furent presens en leurs personnes nobles personnes Maistres Pierre de Ronsart, conseiller et aumosnier ordinaire du roy, Jehan-Anthoine de Baif, secretaire ordinaire de sa chambre, et Amadis Jamin aussy secretaire de la chambre dud. seigneur, tant en leurs noms que comme eulx faisans et portans fortz de Maistres Jehan Galland, Claude Tournet et Charles Garnyer, ausquelz, par le roy, auroit et a esté faict don de la somme qui pouroit provenir des offices de sergens nouveaulx erigez tant ès greniers, chambres et magasins à scel (sic), tant anciens que nouveaulx de ce royaulme, d'une part, et noble homme Maistre Michel Erard, conseiller et maistre des requestes de Monseigneur et des roy et royne de Navarre, ou nom et comme procureur de damoiselle Melchior de Thorigny, l'une des filles damoiselles de lad. dame royne de Navarre, à laquelle damoyselle la royne, mere du roy, auroict ceddé et transporté et delaissé en don toute la finance provenant de la taxe et composition desdits offices de sergens desdits greniers à scel, chambre et magasins tant anciens que nouveaulx de ce royaulme qu'elle disoyt lui appartenir, ledict Everard fondé de procuration de lad. damoiselle dacté du vingt-neufiesme jour de juillet dernier passé, signé Beaufort et Bricquet, ayant pouvoir et puissance entre autres choses de faire le contenu en ces presentes, d'autre part.
Disans lesd. partyes que sur les difficultez qui se presentoient entre eulx sur la concurance desdictz dons que chacun d'eulx respectivement pretendoient leur avoir esté faictz de ladicte ferme desdictes offices par leur Majesté elles avoient chevy et composé ainsy qu'il s'ensuyt : c'est assavoir que lesdictz Ronsart, de Baïf, Jamin, èsdictz noms, ont accordé et accordent que l'execution de l'edit par eulx obtenu de la creation desdictes offices de sergens, veriffié en court des generaulx des aides le deuxiesme jour de juillet dernier passé. ensemble de leurdict don et mandement du tresorier de l'espargne par eulx obtenu à ceste fin, le tout sera et demourra en surceance du jourd'huy jusques à trois moys prochains venans pendant lequel temps ladicte damoiselle de Thorigny sera tenue de faire dilligence à faire les modifications portées par ladicte veriffication touchant les exploictz royaulx ès cours où elle advisera. Après lequel temps passé, ou cas que ladicte damoiselle n'ayt faict lever moudiffications, en ce cas ledit Maistre Michel Erard, oudit nom, a accordé et accorde pour ladicte damoiselle que sans aulcune exception ou limitation dès à present comme pour lors et dès lors comme dès à present, lesdictz Ronsart, de Baïf et Jamin esdictz noms joïssent du benefice de leurdict edict, en facent leur proffict desdictes offices, sans ce que ladicte damoiselle y puisse rien pretendre. Et ou cas que ladicte damoiselle face lever ladite modiffication et oster ladicte restriction, au moyen de quoy lesdictes offices pourroient monter en plus haulte taxe, en ce cas le dict Erard, oudit nom, et pour ladicte damoiselle veult, consent et accorde que lesdictz Ronsard, de Baif, Jamin et leurs consorts soyent payez purement et avant toutes choses de la somme de six mil sept cens cinquante escuz d'or sol, laquelle somme icelluy Erard, oudit nom, a promys et promect bailler et payer aux dessus nommez dedans lesdictz troys moys prochains venans, ou, à faulte de ce, pourront lesdictz Ronsart et consors, sy bon leur semble, prandre pour ladicte somme de six mil sept cens cinquante escuz d'or sol des quictances du tresorier des partyes casuelles, selon les taxes qui en seront faictes par Messieurs des finances, que ladite damoiselle sera tenue de leur bailler et delivrer le plustost que faire se pourra. Et, partant, et aux conditions susdictes, ont lesdictz Ronssart, de Baif et Jamin esdictz noms, ceddé et delaissé à ladicte damoiselle, ledict Erard ce acceptant pour elle, tout ce qui leur pouvoit compecter et appartenir à cause dudict don, avec tous droictz, noms, raisons et actions qu'ilz avoient et pouroient pretendre a moyen dud. don et mandement dessus mantionné et, aux fins que dessus, ont lesdictz Ronssard et consors dessus nommez baillé et mis ès mains dud. Erard pour ladicte damoiselle led. edict qui est dacté du moys de may mil cinq cens soixante et dix-huict, signé sur le reply Paiart et sellé d'un laps de soye rouge et vert, de cire vert sur lequel reply est lad. veriffication signée de Beauvais. Et s'y promectent audict Erard oud. nom bailler et mectre entre ses mains leurdict don et mandement du tresorier de l'epargne, du dix-septiesme juillet dernier passé et les rolles des taxes desdictes offices qui ont esté faictes par Messieurs les intendans des finances, et ce incontinant que lad. damoiselle ou ledict Erard pour elle auroit faict lever leurdict maudiffication. Car ainsy etc, promectant etc, obligeant chascun en droict soy et l'un envers l'autre èsd. noms, renonçant etc. bailler et mectre en ses mains leurdict don et mandement du tresorier de l'espargne du dix-septiesme juillet dernier passé et les rolles des taxes desdictes offices qui ont esté faictes par messieurs les intendans des finances, et ce incontinant.
Faict l'an mil cinq cens soixante et dix-huict le mercredi sixiesme jour d'aoust, doubles.
PERIER [notaire] FARDEAU [notaire]
Origine de l'information :
Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 109, notice n° 23 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).
2011 Date de révision :
2009 Date de création de la notice :
Cote :
MC/ET/XXXIII/212
Inventaire d'archives :
Minutes et répertoires du notaire Nicolas FARDEAU, 1574 - 15 novembre 1596 (étude XXXIII)