Maistre Jehan Dorat, gouverneur du college de Coqueret, fondé en l'université et lecteur public en bonnes lectres, demourant aud. colleige, confesse avoir baillé à tiltre de loier d'argent du jour Sainct-Jehan-Baptiste, jour d'hier, jusques à cinq ans prochains après ensuivans finis etc, et promect garentir à Michel Le Gras, potier de terre, demourant ès faulxbourgs Sainct-Marcel lez Paris, à ce present preneur aud. tiltre pour luy le temps durant, une maison, court, jardin moictoyen derriere, cellier, puys moictoyen, lieux, aisances et apartenances ainsy etc, assiz à Saint-Marcel lez Pariz, rue des Postes, tenant d'une part au Regnard qui pesche, d'autre part aud. bailleur, pour en jouir etc.

Ces bail et prinse ainsi faictz aud. tiltre et outre moiennant, pour et parmy le pris et somme de vingt livres tournois de loier que pour et par chacune desd. cinq années led. preneur en a promis, sera tenu, promect et gaige bailler et paier aud. bailleur ou au porteur etc, aux quatre termes en l'an à Paris acoustumez, premier terme de paiement escheant au jour Sainct-Remy prochainement venant et à continuer etc et sera led. preneur tenu de garnir lesd. lieux baillez de biens meubles exploictables pour seureté dud. loier, ensemble les entretenir de menues reparations et quant au surplus led. bailleur le tiendra cloz et couvert aus us et coustumes de Paris et ne pourra led. preneur bailler, cedder ne transporter ce present marché à autre sans le voulloir dud. bailleur, et a esté accordé que led. preneur pourra faire faire aud. cellier ung fourneau et s'accommoder ainsi que bon luy semblera sans riens dommager et en la fin dud. temps, sera tenu de restablir led. cellier comme avant qu'il avoit faict led. fourneau, à la reservation faicte par led. bailleur de pouvoir tirer de l'eau aud. puys tant par luy que ses gens et autres demeurans en son autre maison joignant celle dessus declarée en paiant chacun par moictyé la corde et l'entretenir et de souffrir aller et venir pour ce faire, car ainsi etc, promectant etc, obligeant chacun en droict soy l'un envers l'autre etc, renonçant etc.

Faict l'an mil Ve cinquante-six, le jeudi XXe jour de juing.

PERIER [notaire] CARTAULT [notaire]

Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 256, notice n° 134 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2011 Date de révision :

2009 Date de création de la notice :