' Furent presens Jacques Gaigneron, maistre joueur d'instrumens et en faict d'armes à Paris, demeurant rue de la Heaumerie, parroisse Sainct-Jacques de la Boucherie, d'une part, et Guillaume Mignot, aussy joueur d'instrumens et maistre en faict d'armes, demeurant à Villeneufve-Sainct-Georges en Brie, d'autre part.

Lesquelz, de leurs bons grez, se sont associez par ensemble pendant deux ans qui, commenceront dans quinze jours prochains en l'exercisse de leur dicte vacation; et, à ceste fin, seront tenuz aller par ensemble par le païs pour monstrer et enseigner leursdictes exercisses et partir par moitié entre eulx ce qui sera par eulx gaigné et en rendre fidel comte l'un d'eulx à l'autre. Et, pour le regard de la despence, chacun d'eulx la paiera - selon qu'il despencera - sans que l'autre en soit tenu. Et, advenant que pendant ledict temps l'ung d'eulx devint mallade l'autre sera tenu de ne le poinct habandonner et luy faire part et moitié dudict gain qu'il fera seul pour luy subvenir à sa dicte malladie et allimens tant que ladicte malladie durera (1). Et de laquelle societé ilz ne se pourront despartir pendant ledict temps sinon en paiant par celluy qui s'en vouldra despartir à l'autre la somme de trente livres tournoiz et sans prejudicier au partage de ce qui seroit lors appartir des esmolumens de leursdictz exercices. Car ainsy etc, promectant etc, obligeant chacun en droict soy corps et biens, renonceant etc.

Faict et passé à Paris, ès estudes des notaires soubzsignez, l'an mil six cens vingt-trois le trente-ungniesme et dernier jour d'octobre après midi et ont signé :

J. GAIGNERON HUART (notaire) G. MIGNOT HAGUENYER (notaire)

Documents du Minutier central concernant l'histoire de la musique (1600-1650), par Madeleine Jurgens, tome I [études I à X, 1763 actes], Paris, Archives nationales, 1967, p. 386XXXIII (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2011 Date de révision :

2009 Date de création de la notice :