Honorable homme Maistre Jehan Dorat, lecteur ordinaire du roy nostre sire en l'université de Paris, confesse avoir eu et receu de noble et scientifique personne Maistre Robert du Gast, docteur regent en la faculté de droit canon en lad. université, par les mains de venerable et discrette personne Maistre Robert Certain, presbtre, curé de Saint-Hilaire au Mont de Paris, à ce present, et de ses propres deniers, comme il disoit, la somme de cinquante livres tournoiz sur et tant moins et en deduction de la somme de quatre vingtz livres tournoiz, à quoy ledict Dorat a chevy et composé amiablement avec led. du Gast ou ses procureurs pour luy, lesquelz le jour d'hier, en la presence des notaires soubzscriptz il advoua de ce avoir faict, et ce tant pour le principal que pour les despens dommages et interestz de certain proces qu'ils avoient entr'eulx pardevant tant au Chastelet de Paris que ès requestes de Pallais, pour raison de la location, par icelluy du Gast par cy devant faict audict Dorat, de la maison ou college de Cocqueret suivant le bail de ce faisant mention, duquel bail icelluy Dorat s'est desisté et desiste pour et au proffict dudict du Gast promectant par ledict Dorat, moiennant ce, vuider luy, sa femme, biens et famille d'icelle maison et college et en bailler plaine possession vuide et vacue audict du Gast dedens trois sepmaines prochaines venant, à la charge toutesfois de rendre par led. Dorat les ustensilles qui luy furent et ont esté baillées par ledict du Gast lors et quant le bail susd. fut faict selon l'inventaire aussi de ce faisant mention, hormis toutesfois usure raisonnable. En quoy faisant il pourra oster et emporter ses porches, estudes de boys, cloisons aussy de boys, huis, fenestres et verrieres, qu'il a peu faire mectre en ladicte maison ou college, en restablissant toutesfois ce que pour ce faire il pourra demolir, en delaissant aussi toutesfois les victres estans de present ès fenestres du corps de logis qu'il tient aud. college et ce des fenestres seullement par lesquelles on veoit et regarde sur la cour, au proffict d'icelluy du Gast et qui seront pour servir à la salle. Et auquel du Gast icelluy Dorat ne payera aucune chose de loyer pour ledict college du quartier escheu au jour de Sainct-Jehan-Baptiste dernier, mais pour recompenser de ce ledict du Gast, icelluy du Gast prandra et recevra à son proffict les deniers deubz par les locataires estans oud. college à cause de louaige qu'ilz en paient escheuz audict jour Sainct-Jehan-Baptiste ensemble les dix livres tournoiz qu'ilz peuvent debvoir de reste pour le terme de Pasques, ensemble à la charge aussi que si aucun desdictz locataires escolliers voulloient achever leur temps du louage jusques au jour Sainct-Remy prochain, icelluy du Gast le sera tenu souffrir aussi en recepvant par luy les loyers qu'ilz pourront debvoir aud. jour Sainct-Remy prochain.

Aussi a esté accordé que led. Dorat ne sera tenu faire aucunes reparations ny mectre les lieulx en autre estat qu'ilz sont de present ny bailler aultres clefz et serrures que celles qui y sont à present, nonobstant que par sondict bail il feust tenu de les entretenir et les rendre en bon estat, sinon ou cas que s'il demolist aucune chose en ostant ce que dessus, il sera tenu le restablir, comme dict est. Car ainsy etc, dont etc, quictant sans prejudice du surplus de lad. somme de quatre-vingts livres tournoiz, montant icelluy surplus à trente livres tournoiz que led. Certain a promis payer ou faire payer par icelluy du Gast aud. Dorat ou au porteur dedans ung moys prochain venant. Car ainsy etc. promectant etc, obligeant èsd. noms chacun en droict soy, renonçant etc.

Faict l'an mil Vc LVIII, le samedi XXVe jour de juing, double.

VALLÉE [notaire] CROZON [notaire]

Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 265, notice n° 145 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2011 Date de révision :

2009 Date de création de la notice :