: Extrait du contenu

[Furent presens Florent Bonjutte, tailleur d'habits pour femme, natif de Bruxelle, fils de René Bonjutte, maistre fourbisseur audit Bruxelle, et de Catherine Lempreur, ses pere et mere, demeurant rue Saint-Honnoré, paroisse Saint-Eustache, pour luy en son nom, d'une part, et Catherine Reveillon, usante et jouissante de ses droicts, fille de feu Pierre Reveillon, sieur de Chasteauneuf, et de Marie Brette, ses pere et mere, pour elle en son nom, d'autre part, lesquels, en la presence, par l'advis et consentement de leurs parens et amys cy-après nomez, scavoir de la part dudit Florent Bonjutte, de Maistre François de Gouyn, chevalier, seigneur de Chapiseaux, escuyer de feu Monseigneur le prince de Condé, de dame Helene de Hallot d'Andouville, dame d'honneur de feue Madame la Princesse, Nicolas de Vallemont, bourgeois de Paris, et Nicolas de Bracque, aussy bourgeois de Paris, amis dudict futur espoux, et de la part de ladicte Catherine Reveillon, de Henry Reveillon, sieur de Chasteauneuf, son frere, Martin Mangny, bourgeois de Paris, cousin, Germain-Antoine Regnard, commissaire-controlleur juré-mouleur de bois, bourgeois de Paris, cousin, à cause de Marie Mangny, sa femme, curateur, Simon Serrand, marchand à Paris, cousin, à cause d'Anne Jullien, sa femme, Antoine Jullien, orfevre à Paris, cousin, Antoine Maillet, bourgeois de Paris, aussy cousin, Jean-Baptiste Pocquelin, sieur de Molliere, damoiselle Armande-Gresinde Bejard, sa femme, Edme Villequin et damoiselle Catherine Le Clerc [sa femme], amis de ladicte future espouze, ont vollontairement reconnu et confessé avoir fait et font entre elles les promesses de mariage, dons, douaires, conventions qui ensuivent, scavoir qu'iceux Florent Bonjutte et Catherine Reveillon promettent se prendre l'un l'autre par nom et loy de mariage et icelluy faire et solemniser en face de nostre mere saincte Eglise et soubz les licences d'icelle le plus tost que faire ce pourra et qui sera advisé et delliberé entre eulx, leurs parens et amis, pour estre lesdictz futurs espoux uns et communs en tous biens meubles et conquests immeubles, suivant la coustume de Paris, (...).

En faveur duquel futur mariage, ladicte future espouze promet apporter audict futur espoux, la veille de leurs espouzailles, la somme de huict cens livres, scavoir six cens soixante-dix-neuf livres unze sols neuf deniers en deniers comptans qui luy sont deubs par ledict sieur Regnard, son curateur, et qu'il a receu de damoiselle Anne Turé, veufve de feu Maistre Pierre Girard, bourgeois de Paris, suivant la quittance qu'il luy en a donnée par devant Mousnier et son collegue, notaires au Chastelet de Paris, le quatriesme jour d'octobre mil six cens soixante-dix, laquelle somme estoit deposée ès mains dudit deffunct sieur Girard pour estre employée à l'effect du present contract et provient du relliqua du compte rendu tant à ladite future espouze qu'à ses soeurs par les enfans heritiers de feu Fabien Magny et Anne Reveillon, sa femme, par devant le commissaire Le Cerf, le cinquiesme may mil six cens soixante-deux et le surplus en meubles et hardes, de laquelle somme de huict cens livres moytié entrera en ladite future communauté et l'autre moityé demeurera propre à laditte future espouze et aux siens de son costé et ligne.

Ledict sieur futur espoux a doué et doue ladicte future espouze de la somme de trois cens livres de douaire prefix pour une fois payé et sans retour, à l'avoir et prendre sitost qu'il aura lieu sur tous les biens dudit futur espoux sans qu'elle soit teneue en faire aucune demande en justice.

Le survivant desdits futurs espoux prendra par preciput des biens meubles de la communauté tels qu'il voudra choisir suivant la prisée qui en sera lors faicte et sans creue jusqu'à la somme de cent cinquante livres tournois ou la somme de cent cinquante [livres] en deniers comptans aux choix dudit survivant.

Sera permis à la ditte future espouze et aux enfans qui naistreront dudit futur mariage d'accepter ou de renoncer à laditte future communauté et en cas de renonciation reprendront tout ce qu'il aura apporté audit futur mariage et ce que, pendant icelluy, luy sera advenu et eschu par succession, donnation, legs ou autrement, ensemble ses douaire et preciput tels que dessus franchement et quittement, sans estre ny sesdits enfans tenus d'aucunes debtes de ladite communauté encore qu'elle y eust parlé, s'y fust obligée ou condamnée dont, audit cas de renonciation, elle et sesdits enfans seront acquittées par les heritiers dudit futur espoux et sur ses biens pour quoy et pour les autres conventions du present contract ils auront leur ypotecque sur lesdits biens du jour et datte d'icelluy. Car ainsy a esté accordé entre lesdictes parties. Promettant etc, obligeant chacun en droict soy, renonceant etc.

Faict et passé à Paris en la maison dudict sieur Regnard, scize rue du Figuier, parroisse Sainct-Paul, l'an mil six cens soixante-treize, le vingt-cinquiesme jour de janvier et ont signé :

Florant BONJUTTE Helene de HALLOT H. REVEILLON REGNARD Armande Gresinde BEJARD Catherine LE CLERC SERREANT BAUGÉ A. JULLIEN GALLOYS (notaire) CHAPISEAUX Catherine REVEILLON Nicolas de BRQUE (sic) Nicolas de VALLEMONT. B. POQUELIN MOLIERE ./. Edme VILLEQUIN M. MAGNY SERAN A. MAILLET DESNOTZ (notaire).

Et le sixiesme jour de febvrier ensuivant mil six cent soixante-treize sont comparus par devant les notaires à Paris soubzsignez lesdictz Florent Bonjotte (sic) et Catherine Reveillon, à present sa femme, qu'il auctorize en tant qu'à luy et pour l'effect des presentes, futurs espoux desnomez en leur contract de mariage cy-dessus et des autre part escript, confessent avoir eu et receu dudict sieur Regnard aussy desnomé, à ce present et acceptant, la somme de huixt cens livres (...)]

 : Cote originelle du document

MC/ET/CXII/366

:Informations concernant le classement et la cotation du document

Acte coté en Réserve.

Voir une description plus complète de l'acte sur l'instrument de recherche imprimé en ligne (rubrique 'Autres instruments de recherche').

:Origine de l'information

Documents du Minutier central concernant l'histoire littéraire (1650-1700) [2295 actes], par Madeleine Jurgens et Marie-Antoinette Fleury, Paris, Presses universitaires de France, 1960, p. 274 (instrument de recherche imprimé dématérialisé dont la version intégrale est accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

ou

Cent ans de recherches sur Molière, sur sa famille et sur les comédiens de sa troupe, Paris, Archives nationales, 1963, p. 544, notice n° CCLXXVII.

ou

Catalogue de la Réserve du Minutier central.

: 2009 Date de création de la notice

: 2009-2011 Date de révision