Nobles hommes Remy Belleau, maistre d'hostel et superintendant des affaires de très hault et puissant prince Monseigneur Charles de Lorraine, marquis d'Elbeuf, conte de Harecourt, et Robert Duboys, controlleur et argentier de mond. seigneur, ayans charge et commandement exprès, comme ilz ont dict, de Monseigneur illustrissime et reverandissime cardinal de Lorraine, oncle, tuteur et ayant la garde noble de mond. seigneur le marquis d'Elbeuf et par lequel mond. seigneur illustrissime cardinal ilz ont promis faire ratiffier et avoir pour agreable le contenu en ces presentes quant requis en seront, confessent et declairent que combien que Maistre Françoys Moreau, clerc de Monsieur Breton, clerc de mond. seigneur cardinal de Lorraine, ayant ce jourd'huy, par devant les notaires soubzsignez, vendu, ceddé, quicté, transporté et delaissé une maison et appartenances d'icelle, assise à Fontainebleau, en la Grand-rue dud, lieu. à laquelle pend pour enseigne le Cigne, moyennant la somme de deux mil livres tournoiz, dont led. Moreau en auroit confessé avoir eu et receu de mond. seigneur marquis, par les mains dud. Duboys, la somme de mil livres tournoiz, selon qu'il apert plus à plain par le contract de lad. acquisition, que neanmoings la verité est telle que led. Moreau n'a faict lad. vente que à la priere et requeste desd. Belleau et Duboys èsd. noms pour la commodité de mondict seigneur le marquis, à ceste cause, en usant par eulx de bonne foy envers led. Moreau, à ce present et acceptant, ont confessé et declairé qu'ilz n'ont aucune chose baillé ne payé aud. Moreau d'icelle somme de deux mil livres tournoiz, ains ont lesd. partyes èsd. noms convenu et accordé entre eulx led. contrat avoir esté faict pour la commodité dud. marquis, comme dict est, partant icelles partyes se sont dès à présent desistées et despartyes, desistent et despartent dud. contrat, à l'effect duquel ilz ont respectivement renoncé et renoncent et consentent icelluy demourer nul comme non faict et non advenu, et, partant, sont demourez ès mains d'icelluy Moreau toutes et chacunes les lectres qui avoyent esté par luy baillez et declarez (sic) ès mains dud. Duboys, dont il a quicté et deschargé led. Duboys et tous autres, promectant etc, obligeant etc, renonceant etc.

Faict l'an mil Vc soixante-treize, le mardy huictiesme jour de septembre.

BOREAU [notaire]

Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 205, notice n° 88 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2011 Date de révision :

2009 Date de création de la notice :