'Furent presens en leurs personnes Gilles Hebert, Jacques Buffeteau, Jacques Gaigneron, François Gauldron, Adam Vallet, Claude Godart et Adrien Peud'argent, tous joueurs d'instrumens à Paris, y demeurant, Lesquelz se sont associez et associent ensemblement en tout le gain qui, au plaisir de Dieu, sera faict entre eulx pendant trois jours commenceant le jour de l'an prochain que l'on comptera mil six cens huict pour aller aux estrennes et qui finiront le jour de la Saincte-Geneviefvre au soyr, pour estre le gain party tous les jours au soir. Pour recepvoir lequel gain ont lesdictz comparans commis et commectent ledict Hebert, lequel s'en est volontairement chargé, a promis et promect en tenir bon et fidel compte ausdictz aultres comparans leurs associez.

Lesquelz comparans jouront des instrumens chacun declaré ainsy qu'il ensuict : assavoir ledict Hebert d'une basse, ledict Buffeteau d'une pareille basse, ledict Gaigneron d'une taille, ledict Gauldron d'une haulte comte, ledict Wallet d'un dessus, ledict Godart d'une taille et ledict Peud'argent d'un dessus.

Et, pour, entre eulx associez tenir le consert ensemblement, ont accordé que ilz et chacun d'eulx seront tenuz de se transporter d'huy en avant jusques audict jour de l'an prochain en la maison dudict Gauldron, size rue de la Bucherie - deux jours la semaine qui sont mercredy et vendredy - accordans par eulx que celluy ou ceulx d'entre eulx qui seront deffaillant de s'y trouver sera et pourra estre contrainct, en vertu des presentes, à payer aux aultres leurs associez comparans qui journellement s'y trouveront trente solz tournois par chacun jour que seront deffaillant de se trouver en la dicte maison par chacun desdictz jours à l'heure de quatre heures de rellevée presizement, ce qu'ilz promectent, chacun de leur part, de satisfaire sans aulcune contravention sur les peines que dessus, n'estoit qu'ilz ou l'un d'eulx ne fussent debtenuz de maladie ou aultre legitime empeschement.

Est aussy accordé que, où aulcun d'eulx ne sauroict bien et deuement sonner sa partye dans deux jours devant ledict jour de l'an, pour et en ce cas, sera loysible aux aultres qui sauront sonner leurdicte partye de les expulcer de leurdicte compagnye et societté; et, en ce faisant, sera tenu et promect payer le deffaillant six livres tournoiz par chacun d'iceulx deffaillans aux aultres comparans pour tous dommage et interestz qu'ilz pouroient pretendre à cause de ce.

Encores est stipullé que après que lesdictz comparans auront commancé à sonner les balletz cy-après speciffiez au premier jour de l'an de maisons ou aulcunes d'icelles qu'ilz auront volonté de sonner auparavant les trois jours cy-devant mentionnez, aulcun d'eulx ne voulust les parachever, en ce cas le contrevenant sera privé du proffict qui seroict provenu des aubaddes commancées; en ce faisant, sera tenu et promect de payer aux aultres acquiesans la somme de trente livres tournois de dommaige et interestz qu'ilz y pourroient pretendre contre lesdictz contrevenans à ce que dessus.

Et, pour cest effect, promect ledict Wallet de fournir aux dessus-dictz associez les partyes necessaires et bien accordantes des balletz qui ensuivent savoir le Ballet de Monsieur de Nemours, appellé le Ballet des Espritz, celluy du Fillour et celluy de Madame la duchesse de Roen - dedans mercredy -, pour en estre par chacun d'eulx pris sa partye, pour icelle apprendre et sonner selon qu'il est devant declaré.

Promectant lesdictes partyes de satisfaire à ce que dict est bien soigneusement et dilligemment sans faire aulcune instance, meffaire et mesdire l'un à l'aultre, ni jurer et blasphemer le nom de Dieu en peine de quinze solz d'amande par chacune fois que chacun d'eulx succombera et contreviendra à ce qui est dessus dict.

Car ainsy, etc., promectant etc., obligeant chacun en droict soy corps et biens, renonceant, etc.

Faict et passé ès estudes des notaires soubzsignez multiple, l'an mil six cens sept le vendredy neufiesme novembre après midy et ont signé :

Adam VALLET GAUDRON GAIGNERON BUFFETEAU MOUFLE (notaire) HEBERT PEUDARGANT GODAR GERBAULT (notaire).

' Et le vingt ungiesme jour dudict mois de novembre oudict an six cens sept, sont comparuz lesdictz Gilles Hebert, Jacques Buffeteau, Jacques Gaigneron, Adam Vallet, Claude Godart et Adrien Peud'argent, tous devant nommez, lesquelz ont dict et declairé que depuis le contract devant escript François Gauldron, leur associé, aussy dessus nommé, se seroit desisté et departy de l'effect et entretenement dudict contract pour n'avoir peu y satisfaire attendu qu'il estoit auparavant associé avec aultres et pour, au lieu duquel Gaudron, les dessusdictz ont prins et arresté avec eulx, pour l'effect et entretenement dudict contract, Denis Mouvant, aussy maistre joueur d'instrumens à Paris, demeurant rue du Bourg l'Abbé, parroisse Sainct-Leu-Saint-Gilles, à ce present et acceptant, qui a promis et promect, pour son regard, de satisfaire et accomplir touttes les charges, clauses et conditions à plain contenuz et portez en icelluy contract, que ledict Monnant a dict bien entendre après que lecture luy en a esté faicte par l'un des notaires soubzsignez, l'aultre present, et à ceste fin sonner de la partye de thaille bien et deuement et qu'il promect apprendre dans le temps porté audict contract par les peines y contenues.

Promectant etc., obligeant etc., renonceant etc.

Faict et passé ès estudes des notaires soubzsignez l'an mil six cens sept sept les jour et an que dessus declarés devant et ont signé :

PEUDARGANT Adam VALLET Claude GODAR MOUFLE Denis MOUVANT GAIGNERON J. BUFFETEAU HEBERT GERBAULT

Documents du Minutier central concernant l'histoire de la musique (1600-1650), par Madeleine Jurgens, tome I [études I à X, 1763 actes], Paris, Archives nationales, 1967, p. 354, notice n° VIII (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2011 Date de révision :

2009 Date de création de la notice :