Noble homme Messire Claude de Ronssart, chevalier, seigneur de la Poissonniere, et Maistre Pierre de Ronssart, prothenotaire de Sainct-Sieige appostolicque, confessent debvoir et gaigent chascun pour le tout, sans division ni discussion, à noble homme Philippe Didato, bancquier, bourgeois de Paris, absent, Anthoine Ricoulx, commis dud. Didato, à ce present, ou au porteur, la somme de six-vingtz escus d'or soleil bons, èsd. especes, pour la cource et voyage que led. Ricoul, pour led. Didato, promect faire faire pour et à la requeste desd. de Ronssart pour l'expédition d'une signature du prieur conventuel et electif de Sainct-Jehan-de-l'Escolle, diocese de Perigueux, pour et au nom de Maistre Pierre de Ronssart, suivant les lectres de nomination du roy nostre sire dud. prieuré, par lesd. de Ronssart baillées aud. Ricoul; ce qu'il promect faire admectre lad. provision pour et ou nom dud. Maistre Pierre de Ronssart dedans le seixiesme jour de ce present mois d'aoust prochainement venant, et, lad. signature que retirera de lad. provision, bailler et delivrer aud. Maistre Pierre de Ronssart le plustost que faire se pourra. Laquelle somme de six vingtz escus d'or soleil lesd. de Ronssart promectent et gaigent chascun pour le tout, sans division ne discution, bailler et payer aud. Didato ou au porteur etc, en baillant ou à l'un d'eulx lad. signature deuement expediée, comme dict est, et a esté declaré ausd. parties que, suivant les edictz au roy, il convient faire insinuer ces pieces ad ce qu'ilz n'en pretendent cause d'ignorance, promectans etc. obligeant chascun en droict soy l'un comme l'aultre, lesd. Ronssart chascun pour le tout sans division ne discution, renonçant mesmes etc, et ont lesd. de Ronssart esleuz leurs domicilles en l'hostel de Maistre Jehan de Courcelles l'aisné, procureur en la court de parlement, pour faire tous commandemens qu'il conviendra faire en vertu de ces presentes et veullent et consentent que tout ce qu'il y sera faict soit d'un tel effect et valleur comme s'il avoit esté faict à leurs personnes.

Faict doubles l'an mil Vc cinquante-six le dimanche neufiesme jour d'aoust.

PERIER [notaire] CARTAULT [notaire].

[A la suite :].

Led. Maistre Pierre de Ronssart confesse que, à sa priere et requeste et pour luy faire plaisir, led. Claude de Ronssart, chevalier, son frere, s'est, ce jour d'huy, obligé avec luy et chacun pour le tout à bailler et paier à Maistre Philippe Didato, bancquier, bourgeois de Paris, la somme de six-vingtz escus d'or soleil, bons èsd. especes, pour le payement de la signature dont mention est faicte es lectres obligatoires de ce faictes et passées pardevant les notaires soubzsignez, promectant aud. Claude sond. frere de l'acquitter et garentir de dommaiges et de luy indemniser ses biens, ses hoirs etc, de lad. somme de six-vingtz escus d'or soleil, ensemble de tous despens, dommaiges et interestz en quoy il pourroict encourir au moyen de ce, et neantmoings luy rendre et paier tout ce que paié et fraié en auroict incontinant le cas advenu à volonté etc, car sans lad. promesse ainsi faicte led. Claude ne se feust voullu obliger avec sond. frere. Promectant etc, obligeant chacun en droict soy, renonçant etc.

Documents du Minutier central des notaires de Paris, Ronsard et ses amis [288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 89, notice n° 12 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

2011 Date de révision :

2009 Date de création de la notice :