À la suite : ratification par Angélique Boüer, 7 janvier 1666.

[Fut presente en sa personne dame Margueritte Chapellain, veufve de feu Pierre de Chavanes, vivant seigneur de Pincelou, Chavanes et autres lieux, conseiller et secretaire du roy, maison et couronne de France et de ses finances, demeurante rue Neufve-Sainct-Honnoré, parroisse Sainct-Roch, au nom et comme ayant charge, se faisant et portant fort de dame Angelique Bouer, espouze et procuratrice de Messire Guillaume Millet, seigneur des Grandz et Petitz Jeure, et autres lieux, conseiller du roy en ses conseils, mareschal de ses camps et armées, gouverneur pour Sa Majesté des villes, chasteau et souveraineté de Chasteau Regnault et forteresse de Linchamp, et d'elle fondée de procuration generalle pour leurs affaires, passée par devant Moufle et Ogier, l'un des notaires soubzsignez, le vingt-troisiesme de l'année derniere, dont la minute est vers ledict Ogier, notaire, par laquelle dame Millet ladicte dame de Chavanes promect faire ratiffier et avoir pour agreable le contenu en ces presentes et de leur en fournir acte en bonne et deue forme au preneur cy-après nommé touttesfois et quantes que requis en sera; laquelle a recogneu et confessé avoir baillé et deslaissé à tiltre de loyer et prix d'argent, du jour et feste Sainct-Remy dernier passé jusques à trois ans prochains après ensuivans, finis et accomplis et promect ledict temps durant faire jouir à Jean-Baptiste Pocquelin de Molliere, vallet de chambre du roy, et damoiselle Armande Grezinde Bejart, sa femme de luy auctorizée, demeurans rue Sainct-Thomas-du-Louvre, parroisse Sainct-Germain-l'Auxerrois, à ce presens, aceptans, preneurs et retenans pour eux audict tiltre ledict temps durant, une maison scize en cette ville de Paris en ladicte rue Sainct-Thomas-du-Louvre, ausdicts sieur et dame Millet appartenant et joignant une grande maison aussy à eux appartenant, consistant ladicte maison louée en ung corps de logis, petite court, porte cochere et autres appartenances et deppendances, de laquelle lesdicts preneurs se contentent, disant les bien scavoir pour les avoir veuz et visittez, pour en jouir etc. Ce present bail faict moyennant la somme de mil livres tournoiz de loyer pour et par chacune desdictes trois années que lesdicts preneurs ont promis et promectent sollidairement l'un pour l'autre, chacun d'eux un seul et pour le tout, sans division ne discution, renonceant aux benefices desdicts droitz et à la forme de fidejussion, bailler et payer à ladicte dame bailleresse audict nom en sa maison à Paris ou au porteur etc., aux quatre termes de l'an à Paris accoustumez esgallement, premier d'iceux escheant au jour et feste de Noel prochain et continuer etc., et outre à la charge de garnir et tenir ladicte maison et lieux garnis de biens meubles exploitables et suffizans à eux appartenant pour seuretté dudict loyer et sortissant nature d'icelluy, les entretenir de touttes menues reparations loccatifves et necessaires quy y seront à faire durant ledict temps et en fin d'icelluy les rendre et deslaisser en bon et suffizant estat, payer par lesdicts sieur et damoiselle preneurs les deniers et choses à quoy lesdicts lieux seront taxez et cotizée durant ledict temps pour l'effect des pauvres, boues, chandelles, lanternes et autres charges de ville et de police et du tout en acquiter et indempniser ladicte dame bailleresse esdicts noms; sy pendant ledict temps il convient faire de grosses reparations en ladicte maison et lieux lesdicts preneurs seront tenus les souffrir et endurer faire sans pour ce pretendre ny demander aucune diminution desdicts loyers ny despens, dommages et interestz, ne pourront cedder ny transporter leur droit du present bail à quy que ce soit sans le gré et consentement de ladicte dame bailleresse à laquelle ils fourniront aultant des presentes en bonne et deue forme à leurs despens. Car ainsy etc; promectant etc, obligeant chacun en droict soy sollidairement, renonceant etc.

Faict et passé à Paris, en l'estude d'Ogier, l'un des notaires soubzsignez, l'an mil six cent soixante-cinq, le quinziesme jour d'octobre après midy et ont signé :

J. B. P. MOLIERE./. PAIN (notaire) Margueritte CHAPPELLAIN Gresinde BÉJART OGIER (notaire).

Ladicte dame Angelique Bouer, femme et procuratrice dudict Messire Guillaume Millet, desnommée cy-dessus, laquelle après que lecture luy a esté faicte du bail devant escript, qu'elle a dict bien entendre, l'a ratiffié, confirmé et approuvé, veult, consent et accordde qu'il sorte son plain et entier effect de poinct en poinct selon sa forme et teneur. Promectant etc, obligeant etc, renonceant etc.

Faict et passé à Paris, en la maison de ladicte dame Millet, l'an mil six cent soixante-six, le septiesme jour de janvier et a signé :

BOÜER. PAIN. OGIER.]

MC/ET/LXXXIII/125

Acte coté en Réserve.

Documents du Minutier central concernant l'histoire littéraire (1650-1700) [2295 actes], par Madeleine Jurgens et Marie-Antoinette Fleury, Paris, Presses universitaires de France, 1960, p. 269 (instrument de recherche imprimé dématérialisé dont la version intégrale est accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).

ou

Cent ans de recherches sur Molière, sur sa famille et sur les comédiens de sa troupe, Paris, Archives nationales, 1963, p.409, notice n° CLXXII.

ou

Catalogue de la Réserve du Minutier central.

2009Date de création de la notice :

2009-2011Date de révision :