Devis et marché entre Michel Vignon, maître charron, et Pierre de Ronsard, conseiller et aumônier du roi, pour la réalisation d'un carrosse.

Memoire de ce que le cocher doibt fournir pour faire une carrousse.

Et premier, les deux brancartz de beois d'orme.

Les sercles de fresne.

Les lances de hestres, garnies de pommes ou boistes.

Le pannier d'ausier.

Les roues, le moyeu et les gentes d'orme, les retz de chesne.

La fleche d'orme ou fresne.

Le timon de fresne.

Les hermons d'orme.

Les moutons d'orme.

Les lisois de fresne.

Une eschelle à monter d'un des costez de quatre ou cinq rollons.

Le tout de bon beois et bien sec, loyal et marchand.

Avec la ferrure de bon fer, non eclatant.

La couverture de cuir de vache, soubassementz de vache.

Les garde fange de veau, la patrouille de veau.

La doublure de bonne serge drappée, de couleur vert guy, avec cordons et franges de sciette, de couleur aussy verd guy.

Les dossiers et la garniture d'estamet desdictes couleurs et chamarés de trece.

Les sieges rembourés de crain.

Les orilliers d'estamet remplis de crain, garnis de franges.

Quatre petitz coussins pour les quatre coins.

Trois rideaulx de serge, de mesme serge que dessus.

Un coffre garni de sa serrure.

Chesne et cadenatz pour fermer le coche à l'entour.

Les lances, sercles et boistes painctz de couleur verd et vernitz avec chifres et ecussons sur le champ qui luy sera baillé.

Les deux herneois garnitz de colliers, trectz et recullementz avec deux caparassons, les testieres et guides.

De longueur de VI piedz et demy et de bonne largeur et haulteur.

Michel Vignon, maistre charron, demeurant à Paris rue de la Plastriere, parroisse de l'eglise Sainct-Eustache, confesse avoir faict marché, promis et promect à noble homme Pierre de Ronssart, conseiller et aulmosnier du roy, à ce present, ce acceptant, de faire et parfaire bien et deuement au dict d'ouvriers et gens ad ce congnoissans, ung coche faict de telle longueur, haulteur et estoffes, tel qu'il est declaré au devis cy dessus escript, et icelluy rendre faict et parfaict, bien et deuement à ses despens, audict sieur de Ronssart ou au porteur de ces presentes lectres pour luy, dedans d'huy en trois sepmaines prochainement venans, à peine de tous despens, dommaiges et intherestz.

Ce marché faict moyennant la somme de quatre-vingt six escus d'or soleil, sur laquelle ledict sieur de Ronssart a baillé, payé, compté, nombré et delivré manuellement comptant, presens les notaires soubzsignez, aud. Vignon, la somme de six escus soleil en frans d'argent, dont il s'est tenu et tient pour contant et bien payé et en a quicté et quicte icelluy sieur Ronssart et tous autres, lesquelz seront les premiers desduictz et rabatuz et le reste, montant quatre vingtz escus soleil que led. sieur Ronssart a promis et promect bailler et payer à icelluy Vignon ou aud. porteur etc, en livrant led. coche faict et parfaict, comme dessus, et prest à atteller chevaulx pour icelluy mener aux champs ou par la ville. Car ainsy a esté accordé entre eulx etc, promectant etc, obligeant chacun en droict soy ledict Vignon corps et biens, renonçant etc.

Faict et passé dans l'enclos du college de Boncourt, près l'eglise et parroisse de l'eglise Sainct-Estienne au Mont de Paris, en une chambre où icelluy sieur Ronssart est logé, le vendredy après midy troisiesme jour de may, l'an mil cinq cent quatre-vingtz cinq.

RONSAR VIGNON.

CORNEILLAU [notaire] CHAUVET [notaire]

MC/ET/VIII/540

Acte coté en Réserve.

[288 actes], par Madeleine Jurgens, à partir des dépouillements de Xenia Pamfilova, Paris, Archives nationales, 1985, p. 115, notice n° 28 (instrument de recherche imprimé dématérialisé, certaines notices sont plus détaillées dans la version intégrale accessible en ligne par la rubrique 'Autres instruments de recherche', voir contexte dans le Plan d’orientation général - Notaires de Paris, guides thématiques du Minutier).Documents du Minutier central des notaires de Paris, Ronsard et ses amis

ou

Catalogue de la Réserve du Minutier central.

2009 Date de création de la notice :